ســـلـــمى ...

يقولون البكا .. ماريّح أبن آدم / وزال آهموم ..!

كــثـر ماسالت الدمعة !! يزيد الحزن ( جيّاته ) ..

جبال الهملايا أول سعودي يحط الرحال هناك

بدأت هوايتي منذ أن كنت صغيراً عندما حاولت تسلق جدار بيتنا بأدوات المطبخ .. أستأذنت أمي بأن أخذ خمس سكاكين وقدر .. ومن أخوي
القايش العسكري الي كان يداوم فيه بقاعدة الملك خالد .. ومن شغالتنا حجابها السري الذي يقي من حرارة الشمس وبرودة الطقس ..


تحجبّت ووزعت السكاكين على خصري ولبست القدر كخوذه على رأسي مسكت أطراف النخله المحاذية لجدار حوشنا وأطراف السعف تنغز بطني بعنف
وانا أستمر في محاولاتي بحثاً عن الطموح والهواية التي أحببت ينتهي الحدث بمحطه!!! من عقال أبوي والنحشه الي تجي بعدها على الزاوية التسعين
شمال غرب بيتنا جهة المستودع الي ضيعو أهلي مفتاحه ولا دروا اني سارقة ليكون المزبن الوحيد من هالشيبه !!


من بكره أذهب للمدرسة التي لم اعرف فصلي ولا حتى السنه الدراسية التي وصلت لها حينها لاني بمجرد وصولي لتلك المدرسة أطلّع أدوات هوايتي المحببه
وأبدأ بتسلق الجدران والهروب الكبير الذي ينتهي بمقهى أبو هيثم على طريق أبوحدرية ألحّق على الحصة الصباحية من برنامج ستار اكادمي وأستمر في مشاهدة
سمّيه التونسية وهي تؤدي رياضتها باللباس المحقط !!


كبرت والأوضاع في البيت وفي سؤودي عريبيا ماتهيئ لك تستمر في أي هوايه حتى لو أنك عالم ذره شغلوك سكرتي في بنده ودبسوك في بطاقات ماستر فيزا وقرض
والوعد في الشرطة والمحاكم الجنائية والبنك الدولي .

بعد تخرجي من الثانوية واختبرت قياس وسويت كل متطلباتهم الي يبونها مني أنتهت علاقتي بالحكومه.. و أتصلو على البنوك يشاوروني أخذ قرض وانا أرفض وهم يلزمون علي
حسيت أن البنك من كثر مايحبنا جالس يعطينا فلوسه يعني بذمتكم في بنوك بالعالم توزع فلوس على الشعب مثلنا ؟ الله يخلي لنا البنوك كل الناس تشتكي منها
وانا بقول كلمة حق في البلاد الي يسمونها متقدمه البنك اذا اتصل عليك وقلت له مابي قرض يسكر السماعة ولا تشوف رقمه بعد كذا لكن بنوكنا الحمدلله ينشبون لك
لين تغير رقمك وتطّلع سوا بأسم هندي علشان لو دورو عليك مايلقونك ..

طرقت أبواب المؤسسات أبحث عن من يهتم بهوايتي التي خفت أنها تندثر فيني ولحد يساعدني ويلمعني ويوصلني للشهره من خلالها .. لكن ماتوقعت ان السعودية تخون
فيني كذا ومالقيت أحد يدعمني .. سولفت أنا وواحد من أصدقائي عن هالهواية وأشار علي أني أسافر للهند حيث هناك كشّاته من جميع دول العالم مخيمين في جبال
الهملايا وتجمعّهم نفس هوايتك . طلعت من عنده ولاردني غير عبدالجبار الي يبيع في بقالة حارتنا هو الهندي الوحيد الي أعرفه قلت له السالفه وتكفل بتذكرة
ووداني المطار ويوم أقلعت الطيارة دفني بخمسمية روبيه أمشي حالي فيها الين أوصل الهملايا ..

وصلت هناك ومن تكسي لتكسي لين ألتحقت مع الكشّاته الي يروحون الهملايا ورحبو فيني وعطوني خيمة صغيره معها دافور وعزبة ماستخدمتها فضّلت اني
اخليها لين أرجع من السعودية أكشت بها للصمان لأن من جد عزبة ماهو عزبنا دله وفناجيل من السنيدي وكاتب السعر بعد التخفيضات الف ريال واذا سألته ليه
قال لك لان الي مخترع هالعزبة سعودي يعني السعودي عالم الذرة شغلتوه سكرتي في بنده والسعودي الي يخترع دلال وفناجيل يجيه الف ريال على كل دله وفنجال
علشان كذا العزبه كرتنتها وأحتفظت فيها وجلست أستخدم سكاكيني الي جبتها من مطبخ أمي والقدور والقايش العسكري .!!

بدأت الرحلات لجبال الهملايا وكل يوم وحنا متسلقين لنا جبل وبديت أخق على الهملايا وأصاب بعشق لدرجة أني مانام الليل يقومون يلقوني على رأس ضلع ثلجي
اسبقهم الين يجوني من بكرة .

وفي حدى هالليالي رحت لحالي ومعي أدواتي واهل المخيم رقدو وأنا اناظر قمة الهملايا والأعلام كلها عليها إلا علم سؤؤدي عريبيا حزت في خاطري وقتها وقلت في نفسي
محد بيرفع راية التوحيد غيري وأنا لها .. وضربت أولى خطواتي نحو القمة بسكاكيني وبدأت الخطوات وتسلقته روياً روياً والأكسجين ينقص واحاول أسوي من الطيسان الي معي
طاسه واحطها على خشمي وفمي علشان ما اسحب اكسجين أكثر .. أقتربت من القمة ومابقي شي لكن في الساعه الصفر وفي حين انا أضرب بالسكين وأثبت عمري في
الثلج وأثبت العلم .. أسمع صوت غريب صمدت وناظرت بأتجاه الأفق لقيت الظلام دامس ألتفت يمين ويسار وجدت اني لحالي لكن مازال هالصوت الغريب حولي حواليي ..
حطيت أذني على الثلج ابي اعرف مصدر الصوت زاد الصوت أكثر جلست أمخش الثلج الي قدامي وأرتفع الصوت طلعّت السكروب وجلست أضرب وأضرب
الين انهار الثلج وانفتح لي نفق طويل .. دخلت فيه وجلست امشي ابي اوصل نهايته شكله مرعب ومظلم جداً .. مشيت اتبع الصوت قام يلتوي النفق
مره يمين ومره يسار الين قرّبت ولقيت ثلاثه شابين نارهم ويتقهون من غوري شاهي سهرانين عليه ويضحكون ويسولفون ناظرت فيهم من بعيد لبعيد وابي اعرف وش
عندهم ومنهم ذولي لكني عجزت اعرف كلامهم بديت بالخوف أكثر يوم شفت اسلحتهم قلت ياولد وش لك باللقافه أرجع لربعك قبل يدرون عنك ويذبحونك
الغريب في الموضوع هو اني شفت عندهم صندوق لونه كاكاوي غامق شكله حلو ومحاوطين عليه وبدهائي وفطنتي عرفت أن هالشي هم حارسينه تعوذت من ابليس
وقلت ياولد أرجع أبرك لك ... رجعت بخطوات خفيفه بحيث انهم مايسمعوني وانا راجع فجئة دعست على حصاه والتفتو كلهم جهتي ناظرت فيهم وقام يصيح
واحد منهم واقوم انا احط رجلي وكل شوي يطيح مني قدر وسكين ويعيق لحاقهم فيني حسيت اني مطبخ متحرك من كثر مايطيح من قدور ومواعين أمي ..
حذفت عمري من مخرج النفق الي دخلت منه وطحت لي في حفرة عمقها ست امتار ناظرت فوق وهم يناظرون فيني ويأشرون جهت الحفرة فجأه راحوا كلهم
ناظرت في الحفرة لقيت فيها نفق دخلته وجلست اركض أركض واناظر وراي خفت انهم يلحقوني ومن الخوف والراعه لو شاركت في سباق اثينا اخذت الذهبية بدون منافس
ناظرت ورى وتأكدت ان محد يلحقني .. خفيت سرعتي وناظرت قدام وانا امشي بالبطيئ وبالحركة البطيئة لقيت الثلاثه قدامي وانا امشي شويّ شوي من الصدمه
خرب الريوس عندي صار البنص على الدعسة البطيئة والقير مايعشق ابتسمت مسوي ماني خايف الين وصلت عندهم وسلمت عليهم
وهم يناظرون في بعض وشافوني ماهجيت استغربوا جلست على ركبي اريح شوي واخذت نفس وصبيت لي شاهي من غوريهم وجلست اشرب كتفني واحد منهم
والثاني يعشّق السلاح يبي يذبحني .. وريتهم فلوس سعودية ومديتها لهم وفصخت ساعتي وكبكاتي قلت خذو الي تبون واحد اخذ الكبك والثاني الساعه
والثالث جالس يناظر صورة الملك على الفلوس واقوم بكل خفة ورشاقة وبحركة سريعة يحسدني عليها جمس بوند رفست الصندوق برجلي وانا متجهة صوب النفق الي طمرت
منه لقطته بيديني واطمر طمرت الأسد وانا حاط في بالي الحفرة الين تشبثت في أطرافها وحطيت رجلي جهت خيمتي الصغيرة عند ربعي .. سكرت السحاب
وفتحت الصندوق لقيت جوهرة من الألمااس النادر ملطخه بالفوسفات مصبوغه بالزمرد .. دريت انها غالية وقلت لازم انحاش من هالمكان ..طربلت الخيمة واخذت عفشي
وأقدوري ولاردني غير السعودية عرضت الجوهرة للبيع وجابت لي عشرة مليون دولار من تاجر مجوهرات في الشرقية سددت ديون أبوي وفتحت لي محل صيرفة
وبعدها بنك مايشتغل فيه غيري انا وعالم ذرة خليته سكرتي في البنك ومهندسين ثنين علشان يجردون حساب اخر الشهر ودكتور نفسي وظفته بوظيفة على الماركتينق
يتصل على العالم ويقنعهم بحكم خبرته في النفسيات انهم ياخذون مني قروض وبطاقات فيزا وكروت شحن سوا وحلا بلص وشهر عليك وشهر علينا ...




مايستفاد /

1 /هوايتي بالتسلق بدأت فيني وانا منحاش من الشايب يوم درى اني مهرب من المدرسة وحالياً أصبحت اول سعودي يصعد جبال الهملايا .
2 /مبطي عنكم وحبيت اعرض لكم وحده من هواياتي وتعرفون ان مافيه هوايه عندي ماتجلب الحظ لولا هواياتي كان صرت سكرتي في بنده .
3 /بحكم خبرتي في البنوك لاتخلي برصيدك البنكي ولا ريال لان بنوكنا اذا شافو مواطن معاه فلوس دبسوه بقرض وبطاقات ودخلوك السجن .
4 / اصرف مافي الجيب يأتيك مافي الغيب .
5 /المستفاد الحقيقي من الموضوع هو اني رفعت العلم السعودي في جبال الهملايا لكني للحين ماني عارف وش مستفيد !
6 / ابشركم شقتي باقي لها سراميك وتخلص
7 / الي عنده خبره في الديكورات والأصباغ وتشطيب البيوت لايبخل علي وكل شي بحقه .